#GAZA

هولا

تدمع عيني كل ما شفت صورة من غزة

دحين كل البنات بيتجهزوا و يتكشخوا بشكل في الواقع "مثير للسخرية"

و في كل ثانية تقضيها الانسة التافهة بانها تسوي اشيائها التافهة، تصعد روح شهيد للسماء

لا تقولوا stop the war (اوقفوا الحرب)

مدفعيات اسرائيل: آلاف

مدفعيات فلسطين: صفر

صواريخ اسرائيل: آلاف

صواريخ فلسطين: صفر

فين الحرب في الموضوع؟!

هادي مو حرب، هادا سفك دماء

اتمنى اني اروح هناك و احاول ادافع عن كل روح اقدر ادافع عنها، ابغى اسوي شي

لما قلت كلام عن غزة في قروب صحباتي في الواتساب

قالتلي وحدة من البنات 

"امجاد خلاص مالك صلاح لا تتدخلي في السياسة انتي سوي الي تقدري عليه و ادعي لهم ......"

كدا قالت، نصاً، انصدمت جداً من ردها!

طبعاً رديت عليها رد طويل انو ماهي مسألة سياسة، مسألة انسانيه !

و ليه يعني تقول كدا؟! لانو الجوالات مراقبة ؟!

يا ليت يسووا خير و ينقذوا الارواح الي بتتعذب، بدال ما يجلسوا زي قلتهم يراقبوا شعبهم !

حسبي الله و نعم الوكيل، الناس بتموت يا جماعة، فين انسانيتكم !

الله يصلح الحال ... 

اشوفكم في التدوينة الجاية

هولااااا

سحبت؟ ادري

ما فتحت اللاب الا عشان اجرب لعبة، بعد ما خلصت فل ميتال ركنت الماكبوك في الغرفة و سحبت XD

دحين شكلي حارجع زي اول، باتابع الجزء التاني من الخادم الاسود، المفروض اتابعو من اول بس كسلت 

المهم، اليوم، في الواقع، امس رحت الجيم و لقيت كل امووووو فااااضي!

ما كان فيه الا وحدة عجوزة - بدون اهانة - و جلست اتمرن ٥٠ دقيقة يمكن، جات جنى صحبتي و مدري اش قالتلي، بس اكتشفت انها كانت تحسب اني حاروح معاها هي و لجين تايم بريك، قلتلها هااه، مدري عن شي ترى، جايين دحين تقولولي !

دقينا ع لجين و اكتشفنا انو سوء فهم، جلسنا نتمرن و كنت اشوف فلم مول كب بدون صوت، كان نسبياً ممل، و رحت استنجد بمنال الي احب و انبسط اني اكلمها، اقترحت جنى نروح نجلس و ما رفضت 

- للآن المكان فاضي ـ

رحنا جلسنا و نهرج، فجأة جات المديرة المزعومة و قالتلنا لا تجلسوا ع هادي الكنبة 

قلتلها ليه، قالت بس لا تجلسوا عليها، قلتلها طيب بس ليش؟

قالت بس كدا اجلسوا في اي مكان بس هنا لا

اش العبط دا، كنبة ضيوف الشرف مثلاً يعني ؟!

قمنا رحنا فوق، و اشتريت ايسكريم خلاني اتروش انا و جوالي بتنقيطو

فجأة اكتشفت انو جنى كائنة قارئة زيي ") !

قعدنا نتكلم ع الكتب و نصرخ من السعاده زي الهبل.

فجأة اقترحت جنى اقتراح خارق الذكاء، اننا نخرج من الجيم و ندخل، قلتلها اش الفله في الموضوع، ترى ماهي مدرسة مثلا يعني XD

خلتني اضرب مشوار و اجيب عبايتي عشان نخرج نص دقيقة قدام الجيم -.-

اهم حاجة انها استوعبت بنفسها انها فلة ضعيفه -.-

دخلنا، و فجأة جوا ناس يبغوا يشتركوا، وديناهم لموظفات الادارة الي كانوا فوق في استوديو مدري اش يسووا

فجأة اختفوا الموظفات، و احنا ما علينا منهم يعني، جوا ناس تانيين يبغوا يشتركوا، و دق التلفون كتير، و اخواتنا مختفيين، دق الحارس الباب، ردينا و قال انو فيه واحد يبغى يجدد اشتراك، ما لقينا الموظفات، رجعت لو انا و سالتو عن اسمها، قال ما يدري و انو هو الحارس، قلتلو طيب النادي فاضي يعني، و الاداريات ما ندري فينهم.

دق تاني يسال عن رقم النادي، قلتلو ما ادري وللآن الاداريات مو فيه، قال انتوا ما تشتغلوا هنا!؟

- هيا خدلك، من كتر ما انو احنا شايلين الموضوع و بنرد على الناس الي بيجوا حسبونا نشتغل هنا - 

قلنالو لا احنا ميمبرز بس

فجأة دق الباب تاني و كان فيه شخص يسال عن وحده اسما اشواق او ابرار

لفينا الجيم كلو ندور على هدولا، بعدين اكتشفنا انها تشتغل هنا

فقعدنا ندور على الاخوات، سالنا عاملة النظافه، قالت هما يطلعوا يجلسوا فوق في مكان ما، اتجرأت و طلعتلهم، كان مكان شبه مهجور، دقيت الباب محد رد و فتحتو، سالتهم لو فيه وحده اسمها اشواق، قالوا لا، قلت اوكي، و قفلت الباب، و سحبت جنى و حطيت رجلي لاني حسيت اني كنت مره قطه و راحت جبهتي

فجأة نزلوا ٣ منهم 

و قالتلي وحدة "حبيبي انتي كيف طلعتي فوق" قلتلها انو عاملة النظافه و كدا، و زبدتلها الموضوع كلو بدق عشان ينتبهوا انهم مهملين ! .. قالت اوه طيب، ترى ممنوع تطلعي فوق - احسها من كيسهم -

خرجوا اول ٣ نزلوا، و دقينا انا و جنى على ناسنا عشان نروح لانو هزلت ..

جا الشخص حق جنى قبلي، راحت تجيب عبايتها، وجاتني و قالت لوكري ما يفتح - جاتها فويقة فصار كل كلامها يضحك، و انقلب الوضع حشيش - و ما كان فيه احد من الادارة حولنا، حاولنا نجيب رقم وحده من المسز الي فوق، لانو مو ناقصنا تهزيء لو طلعنا، و ما قدرنا

دخلوا اتنين معاهم ماك - ترى المفاشيح اكلوا بيتزا و طالبين ماك كمان، قلك ويلنس سنتر قال - سالناهم لو يعرفوا للوكرز ولا لا طلعوا كاشيرات، فجأة نزلوا الاتنين التانيين، و جاتني وحدة قالتلي "حبيبي ممنوع تطلعي فوق طيب؟ - قلتلها طيب و بعد ما مشوا سويت حركة بوجهي زي ايام الابتدائي في المدرسة XD

بعدين استوعبت،  و قلت لجنى اوه بشاير !

راحت تكلمها، قالتلها انو كلمي رزان، قلنالها رزان راحت

قامت دقت ع رزان و علمتها و فتحنا اللوكر و سوينا بارتي ابو "يااااي" هادية انا و جنى لما راحت بشاير XD

خرجت جنى، رحت جلست فوق و اقول لمنال انا لونلي، اعتقد لقيت كاميرة مراقبة، قالتلي منال سويلها هاي بالله XD

and i did XD

خوفك تطلع مو كاميرا ولا شي و يكون فيه احد شافني بطريقة ما XD

دق داني - السواق - اخيراً،  و رحت رقصت بشكل غريب جداً في منطقة اللوكرات، لما خرجت لقيت ٣ كانوا بيشتركوا، قالتلي وحده منهم " هو اشبو كدا فاضي؟ " قلتلها لانو تقريباً اخر يوم، و في العيد كمان حيوقف، قالتلي ايوا هو حيفتح مدري كم شوال مو ؟

كانت معلومة جديدة عليا، بس قلتلها "ياه ياه" 

قالتلي سنه كم انتي 

[ دوبي اكلت تهزيئة، بس اقولكم ") ]

قلتلها طالعة تاني متوسط، قالتلي اوه هادي ( مدري مين ) قدك، دوبنا مسجلين احنا فما تعرف احد

قلتلها العمر كلو يارب، قالتلي يصير بعد العيد مع بعض ان شا الله

قلتلها، اوكي اشوفكم ع خير، قالتلي سي يو

..

تقريباً كدا انتهى يومي، الا انو و احنا داخلين البيت انور جاب حليب و زنيت عليه اني انزل معاه لاني ادري انو للبسه الي تخاف مني خوف اليم، و انا نازله هو صب و انا اطالع في البسه، قامت هي انصدمت تطالع فيا و فيه، مفرصعه عيونها و ترمش XD

و بس، شكراً للقراءة

اشوفكم في تدوينة تانيه :c

هولااااا

كعادتي ما عندي شي محدد اقولو 

بس تعرفوا شعور انو يكون عندك to do list او قائمة اعمالك الي تبغى تسويها اليوم ؟

شعور جميل جداً ترى، تحس انك شخص واو كدا و منظم، و برضو يعني تنظيم زي ما قلت، جربوا الحركة دي خصوصاً في ايام المدارس - اسفه - مع الواجبات و كدا

افتكر قبل الاجازة مع بداية السنه - تقريباً - و انا عندي نوت باد - لوح تتثبت عليه اوراق - و اكتب فيه كل شي ابغى اسويه لما ارجع البيت، و كل شي لازم اسويه، يعني واجبات و مشاريع و مذاكرة و نكد، و اشياء انا جات في بالي او احد من صحباتي قالي عنها او اي شي زي كدا، و احط جمب كل حاجة دائرة و مربع، يصير لما اوصل البيت اراجع الاشياء كلها و ارتبها في المربعات حسب الي اسويه اول، طبعاً اشياء الدراسة قبل الرغبات، و الاشياء المعفنة قبل الاشياء الي تحمس

و كل ما خلصت شي حطيت صح في الدائرة

على نهاية السنة صرت ارسم في الورقة نفسها حقت المهام، و صارت الورقة تتعبا رسمات، بعض منها نزلتها في انستقرام في هاشتاقي #امجاد—صارت—ترسم، احس فيه شي غلط في الهاشتاق، الشرطة، على اي حال، بما انو ما عندي هرجة حاحكيكم على يومي و كدا

اليوم كالعادة رحت الجيم، و قابلت البنات و كدا، سويت تحدي انا و شدّو بنت خالتي مين يحرق اكتر ع الدراجة، و فزت انا، هي فازت المره الماضيه، يعتبر تعادل يعني

بعد ما خلصنا رحنا ع اجهزة العضلات الي مو ثقيلة مره يعني، مدري كيف اشرحها بس الزبدة زي حقت العضلات بس وزن خفيف

و اخدنا لفة ع الاجهزة كل جهاز ٥٠ مره، و كنت انا الي اعد، حسيت نفسي زي المدربين، كدا خطيرة

و لحقنا الكلاس بعد خمسة دقايق ولا اتنين، و كانوا البنات بيجروا ري ما قالت المدربة، بس اكلوا تهزيئة لسبب ما

و قعدنا نسوي التمارين و كدا، و عدت الكلاسات بدون شي مثير للاهتمام، بعدين لما خلصنا كل الكلاسات كانوا البنات - ٣ منهم - يبغوا يدخلوا ساونا او بخار، و انا ماكنت ابغى لسبب ما، و راحوا كلهم و جلست انا اتكلم مع البنات في قروب الواتساب الين سحبوا عليا و قررت اروح اكل، لما خرجت من اللوكرز ايريا لقيت فيه بنات كمان، بس الادمية الي تبيع ما كانت فيه، و نزلت ادور عليها لقيتهم متجمعين عند اللوكرات الي تحت - ناس الادارة نصهم - و طلعت و قلتلهم انو عندها شغلة و شويه و تجي -مع اني ما كلمتها اصلاً هيهي- و في الاخير جات، و خاطرت باني اطلب شي ما عمري سمعت باسمو بس اعرف انو دجاج، طلع طعمو كانو ولا شي، تقريباً

و فجأة البنات جلسوا يقولوا اني زعلانه، و انو اشبك و مدري ايشكلو، بس انا مدري عن شي -.-

خرجوا بنات خالتي الاتنين - شدو و شهد - و جوري صحبتنا من الشاورز، و قالتلي شدو - مدري متى بالزبط - انها حترجع معايا و ركبنا السيارة و انا و شدو نقز بخلق الله، و نستهبل، و فجأة انشقت مخدة الرقبه حقت ابرار اختي - ابرار لو بتقري عدي الكم سطر هادا - و طلعت الحبوب الصغيرة حقتها، و سوتلنا حفله، و بعدين اقترحت شهد نربطها بشي، و اعطتنا بكلة شعرها، و ربطناها، شكلها مره اهبل XD .. شوفوا، طنشوا كل الاشياء الي حولها p:

و بعد ما خرجوا البنات لقيت من جد ارضية السيارة صارت مسبح، و انا خارجه قلك قلك قعدت انضفها، و السواق يقول خلاص خلاص بعدين، و ماسكة القاروره و المخدة و المحفظه و اكلم ماما بالجوال بيد، و انضف بيدي التانيه، اتخيلوا عاد منظري

و بس طلعت و قعدت اقرا من كتاب أطر العقل، و جلست مع اجهزتي، اذن الفجر صلينا انا و ماما، بس قبل ما نصلي وريتها اختبار العمر المروني - من خواطر - كم تتوقعوا طلع عمرها ؟

١٠ سنين !

ماما جسمها مرن اكتر مني، مع اني انحف منها و يمكن لياقتي اعلى لاني اسوي رياضه كتير الفترة دي، بس ماما من و هي صغيرة كانت تسوي حركات تعتبر من حركات اليوقا الهندية، بس هي كانت صغيرة و تسويها للمتعه، زي الشولدر ستاند الي طلعت في خواطر

ايوا صح !

لاحظتوا كيف انو احمد الشقيري لياقتو صارت مره احسن !

حتى شدو بنت خالتي تقول انها حست انو نحف

الله يخليه لنا ياخي، من جد رجل لن يتكرر 3>

اشوفكم في تدوينة تانيه !

و السلام عليكم :c

امجاد الهندي 

( للتوضيح تنوع المواضيع في هادي التدونية هو بسبب اني كنت اتفرج مسلسل و بعد كل حلقة اجي و اكتب جزء مختلف )

هولاااا !

جاتني فكرة فجأة اني انشر من قصصي هنا 

على اي حال ممكن اسويها يعني، فترقبوا قصة مني في يوم من الايام p:

حاليا جالسة اعيد انمي fullmetal alchemist .. لانو جديا يستحق 

غالبا اكره اني اتابع شي لاني احس كانو دوام، بس فل ميتال حاجة جميلة لدرجة اني عدتها !

هو حاليا الحاجة الوحيدة الي بتخليني استخدم الماك بوك .. معظم الوقت اكون ع الايباد 

بس احس اني باستمتع باستخدام اللاب و كدا 

انا عندي نظام ويندوز في الماك، محملتو و كدا، و متعودة ع كيبورد الويندوز اكتر من الماك 

فابلعوا كلجاتي الين اتعود عاد p:

شعور جميل يكون عندك مدونة ولا حاجة تعبر فيها عن نفسك و رأيك الشخصي بحرية 

و بدون ما تهتم لو فيه احد بيتابعك او لا ( مع انو احيانا شي محطم لو محد بيعبرني )

ياخي فيه ناس كتير مره اتمنى اقابلهم، بس مو اقابلهم كمجرد معجبة 

يعني يكون بيننا علاقة عمل او صداقة و اكون حاجة كبيره زيهم 

زي اقرب مثال في راسي احمد الشقيري

نفسي ادخل في عمل مع احمد، اكون من فريق العمل يعني، و حيكون ليا الشرف طبعا لو صارت 

طموحي اكبر من طموح الناس الي بس يبغوا يشوفوا المشاهير الي يحبوهم و ياخدوا سيلفي ولا توقيع و خلاص

ما اعرف قد ايش حيكون طول التدوينة دي، بس اتمنى تكون اطول من السطرين الي قبلها p:

..

تعرفوا شعور لما تكون مغرم بشي خيالي، وكدا مره خاق مع الشي هادا ؟

هادي انا مع ادوارد الريك حبة الفاصولياء اللطيفة 3> (حاتفقع، لول)

 احب حركاتو و كلامو وكدا، من اجمل الشخصيات الي مروا عليا في تاريخ مشاهدتي للانمي

ما اعتبر نفسي اوتاكو، لاني مو مهووسة بالهرجة و ماهي شغلي الشاغل ( من فين جبتها دي شغلي الشاغل ؟! )

بس جديا احس اتمنى لو كيمياء فل ميتال الكميست ( معنى الاسم الكيميائي المعدني الكامل ) حقيقية 

ادري انو حيصير دمار و حتتدمر بلاد مره كتير خاصة لو وقعت في اليد الخطأ !

بس اتمنى لو تكون حقيقية، ع الاقل الاستخدام البريء الي كانوا يسووه إد و آل و هما صغار ( التحويل البشري برا الهرجة ) او الخيمياء الي هي الكيمياء في الطب و كدا، كانت حتكون حاجة مفيدة من جد !

..

بما اننا في رمضان خلينا نهرج شوية عنو 

الناس صارت فاهمة رمضان مره غلط !

يعني نص الخلق عندهم شهر اكل، و النص التاني عندهم شهر فُرجة و تلفزون  - الا من رحم ربي طبعاً -

يا جماعة لا لا ماهو كدا!

اصلاً كدا نص الشعب حيكون صيامو خطأ - الا من رحم ربي تاني - 

حيكون خطأ طبياً لاننا بناكل بشكل مو كويس - راجعوا حلقة خواطر (رمضان بريء) - 

و مجروح دينياً لاننا بنشوف مناظر مو كويسه و بنستغل ( اللهم اني صايم ) في اننا نسب -.- 

و بعد المغرب بطريقةٍ ما يصير الحرام حلال! .. زي اقرب مثال الاغاني !

يعني بعد المغرب حلال و قبلو حرام ! .. سمبوسه هي ولا ايه ؟! 

من جد رمضان بريء من الهبل الي بنسويه 

- اشبي عصبت انا ؛-؛ -

..

اوككي اعتقد اني حاودعكم دحين ^^" 

اشوفكم في تدوينة تانية 

( ظللت الكلام حسب المواضيع، فضاوة صح؟ .. اسفة لو انو عيونكم صارت دائرة الوان بسبب اختياراتي الفاقعة )

أول تدوينة D:

هوولاااا D:

بصراحة ما أعرف اش اقول بس طقت في راسي و قلت اسوي مدونة، غالبا حاكون باتكلم للجدار، و احتمال كمان ينسحب عليكم يا معجبيني الخياليين p:

احتمال سحبتي حيكون اكبر لو اني ما حاقدر ادون من مكان غير الماكبوك 

anyway

اشوفكم في تدوينة تانيه :c