معاناة مالية شخصية

هوللاااا

بدايةً فاكرين لما قلت اني حارجع زي اول لاني باتابع الخادم الاسود؟ .. يااااهه في نقطة ما نسيت اني باتابعو اصلاً ☺️

لقيت الآب في الآبستور 🙏

حاحط ايموجيز اخيراً 

بس لسببٍ ما شكل البرنامج مرة ابو كلب، كانو من تحديث اي او اس ٥ ! .. مقارنة بقوقل بلس يعتبر بلوقر زبالة

حتى ستايلو مرة ابو كلب، صح الجزء حق الاعداد طبيعي يكون ابو كلب شوية، بس في الموقع كان شكلو مقبول جداً ! كان بالعكس ترتيبو ممتع

قوقل كانو عندها اكتر من ولد و كلهم معيشتهم في نعيم الا الوسطاني، قوقل بلس الكبير و بلوقر الوسطاني، يوتيوب الصغير المدلع عاد، مدري لو فيه غيرهم بس اعرف انهم مدلعين امتر من هادا

مثالي يقتل، ادري

على اي حال 🙏 

خليني اتكلم في الموضوع الاساسي

اليوم فكرت فجأة في الايفون، و قمت - عشان اتوضى - و طالعت في ماما و قلتلها "انا كم فلوسي؟" ء

طالعت فيا و ادتني نظرة ال"طفرانة يا بنتي" قلتلها اش صار على الصندوق حق الخمسعشرينيات ؟ -جمع خمسة و عشرين من كيسي- 

الصندوق هادا كان عبارة عن حصالة مصنوعة من افخر انواع علب الاحذية ✨ .. و اخونا الكبير يدينا كل اسبوع خمسة و عشرين ريال، و نحطها

مسويتو من ثالث ابتدائي، كنت كاتبة عليه "لا يفتح حتى وصول الجامعة" كانت افكاري بريئة و حالمة صراحة

المهم، نرجع 

قالتلي ترى انا ما باخد من فلوسك و مدري ايه

قلتلها طيب ادري انك ما بتاخدي مني بس اش صار ع الصندوق ؟ 

مدري اش قالت، بس الي فهمتو انو انصرف منو و قالت اخر شي اشتريتو لك هوا طقم الالماس هادا - و اشرت على دولابي الي هوا مخزن كل حاجة غالية، مادياً زي الكلام الفاضي حق الحريم، و معنوياً زي حلوياتي - 

قلتلها و انا كنت ابغاه ؟ 

قالتلي مو لازم تبغي 

-لحظة صمت- 

..

*نغمة ٩٩* 

.. 

'( 

جمعت حطام آمالي و ذهبت الى الحمام '( 

و انا في الحمام باتوضا فكرت في كمية الطرق الي ممكن اجيب بيها فلوس

و كان من ضمنها 

١ - اني ابيع الاغراض القديمة حقتي بالنت / صعبة

٢ - اني اكتب كتاب و انشرو / صعبة

٣ - ابدا عملي الخاص / صعبة لاني ما اعرف اش ممكن يكون العمل 

٤ - اصير يوتيوبر / صعبة لاسبابي الشخصية، و لكسلي

٥ - اشتغل اعمال تكون زي المساعدات للناس الي عندهم اعمال حقيقية / صعبة، فين الاقي ناس زي كدا

٦ - اشتغل / عمري ضدي و الوقت ضدي 

٧ - اجمع من مصروفي و انا ساكتة زي الطيبين ') / سهل بس ياخد مدة

شكلي حاسوي السابع، واو رقمي المفضل كمان، صدفة

في الاخير؛ قليل مستمر خير من كثير منقطع

دي الجملة عبقرية

حاطلع مهاراتي الاقتصادية و ابدا اجمع فلوس

اشوفكم في تدوينة تانية c: 

WTF ?! .. مافي اعدادات تزبط التدوينة ؟!، التطبيق فاشل فعلاً

(عدلت التدوينة من الماك بوك، ولا الآب فاشل اصلاً)